HARADINAJ PËR TË HELMUARIT NË DEÇAN: JEMI NË PRITJE TË RAPORTIT ZYRTAR PËR SHKAQET

Kryetari i Aleancës për Ardhmërinë e Kosovës, Ramush Haradinaj ka reaguar pas raportimeve të shumë raste të helmimit të qytetarëve në komunën e Deçanit.

Haradinaj ka shkruar në Facebook se me shqetësim po e përcjellim situatën në Komunën e Deçanit.

“Me këtë rast, falënderoj Shtabin Emergjent të Komunës, kryetarin Bashkim Ramosaj, personelin mjekësor dhe teknik të QKMF dhe të gjithë ata që janë të angazhuar në menaxhimin e kësaj situate. Përderisa jemi në pritje të raportit zyrtar për shkaqet e këtij helmimi, të gjithë qytetarët që kanë simptoma, ju uroj t’i tejkalojnë sa më shpejt”, ka shkruar ai.

Qindra qytetarët të Deçanit mbrëmë dhe sot janë duke kërkuar ndihmë mjekësore në Qendrën e Mjekësisë Familjare në këtë komunë, mbi dyshime se janë helmuar nga uji i pijes.

Lidhur me këtë rast, KRU “Hidrodrini” në Deçan ka lëshuar një njoftim ku ka kërkuar që banorët e fshatrave, Prejlep, Rastavicë, Irzniq, Gllogjan, Shaptej, Gramaqel, Baballoq, Ratishë dhe Jasiq i ri të mos e konsumojnë ujin deri në njoftim të radhës.

“Pas shfaqjes së dyshimeve të para, të pavërtetuara deri më tash, KRU ‘Hidrodrini’-Njësia Operative – Deçan, në koordinim edhe me autoritetet komunale, ka marrë të gjitha masat urgjente duke hulumtuar shkaqet e mundshme. Njoftojmë se deri në këtë çast, nuk ka asnjë bazë të vërtetuar se shqetësimet në fjalë mund të kenë ardhur /ose/ mos ardhur, si pasojë e ujit. Andaj, deri në kthimin e analizës së Ujit nga ana e IKSHPK-së, ky APEL mbetet në fuqi”, thuhet në njoftimin e “Hidrodrinit”.

Drejtori i Qendrës Kryesore të Mjekësisë Familjare “Adem Ukëhaxhaj’, në Deçan, Selmon Berisha ka bërë të ditur se vetëm gjatë natës së mbrëmshme ndihmë mjekësore kanë kërkuar 164 pacientë, ndërsa edhe sot qytetarë të tjerë po kërkojnë ndihmë.

“Në QKMF në Deçan është një numër i shtuar i pacientëve, do të thotë gjatë natës kanë qenë 164, mirëpo edhe sot po vijnë pacientë për të kërkuar ndihmë. Ne nuk mund të themi se është helmim nga uji apo sëmundje virale apo bakteriale meqenëse nuk kemi bo analiza, nuk i kemi analiza të ujit”, ka thënë ai për Reporterin.

Berisha ka treguar se në QKMF-në e Deçanit janë gjithsej 10 shtretër dhe të gjithë janë të mbushur, ku pacientët po marrin infuzione./KP